Milanning «Inter» klubi bosh murabbiyi Kristian Kivu jamoaning muvaffaqiyatlariga qaramay, o‘z faoliyatiga yuqori baho berishdan tiyildi.
Ruminiyalik mutaxassis «neradzurrilar»ni Italiya kubogi finaliga olib chiqdi — yarim finalning javob uchrashuvida «Komo» ustidan irodali g‘alaba (3:2) qo‘lga kiritildi. A Seriyada ham vaziyat ko‘ngildagidek: «Inter» chempionat yakuniga besh tur qolganda yaqin ta’qibchilari «Milan» va «Napoli»dan 12 ochko oldinda bormoqda va chempionlikni deyarli naqd qilgan.
Shunga qaramay, klub matbuot xizmati Kivuning o‘z ishiga nisbatan tanqidiy fikrlarini keltirdi:
«Men o‘z ishimdan qoniqmayapman. Bundan ham ko‘prog‘iga erishishim, mashg‘ulotlarda harakat qilib, o‘yin amaliyotiga loyiq bo‘lgan futbolchilarga ko‘proq imkoniyat berishim mumkin edi. Ha, bundan yaxshiroq ishlasa bo‘lardi. Bu haqda tez-tez o‘ylayman. Ehtimol, ayrim futbolchilar borasida bee’tiborlikka yo‘l qo‘ygandirman», — dedi murabbiy.
Ma’lumot uchun, Kristian Kivu o‘tgan yilning yozida Simone Indzagi o‘rnini egallab, bosh murabbiy sifatida ish boshlagan edi.
