Миланнинг «Интер» клуби бош мураббийи Кристиан Киву жамоанинг муваффақиятларига қарамай, ўз фаолиятига юқори баҳо беришдан тийилди.

Руминиялик мутахассис «нерадзуррилар»ни Италия кубоги финалига олиб чиқди — ярим финалнинг жавоб учрашувида «Комо» устидан иродали ғалаба (3:2) қўлга киритилди. А Серияда ҳам вазият кўнгилдагидек: «Интер» чемпионат якунига беш тур қолганда яқин таъқибчилари «Милан» ва «Наполи»дан 12 очко олдинда бормоқда ва чемпионликни деярли нақд қилган.

Шунга қарамай, клуб матбуот хизмати Кивунинг ўз ишига нисбатан танқидий фикрларини келтирди:

«Мен ўз ишимдан қониқмаяпман. Бундан ҳам кўпроғига эришишим, машғулотларда ҳаракат қилиб, ўйин амалиётига лойиқ бўлган футболчиларга кўпроқ имконият беришим мумкин эди. Ҳа, бундан яхшироқ ишласа бўларди. Бу ҳақда тез-тез ўйлайман. Эҳтимол, айрим футболчилар борасида беэътиборликка йўл қўйгандирман», — деди мураббий.

Маълумот учун, Кристиан Киву ўтган йилнинг ёзида Симоне Индзаги ўрнини эгаллаб, бош мураббий сифатида иш бошлаган эди.