"Барселона" янги ҳужумчи қидиришда давом этмоқда. Каталония клуби эътиборини Бельгиянинг "Брюгге" жамоаси форварди Николо Тресольди тортди.

Инсайдер Экрем Конур маълумотига кўра, "Барселона" бош мураббийи Ханс-Дитер Флик италиялик оилада туғилган немис футболчисини Хулиан Альваресга муқобил номзодлардан бири сифатида кўрмоқда. "Атлетико" эса аргентиналик ҳужумчисини қўйиб юбориш ниятида эмас.

"Брюгге" Тресольди трансфери учун тахминан 40-50 миллион евро талаб қилмоқда. 22 ёшли футболчига Лондоннинг "Арсенал", "РБ Лейпциг", "Атлетико", "Манчестер Юнайтед" ва бошқа қатор клублар ҳам қизиқиш билдиргани ҳақида хабарлар тарқалган.

Тресольди жорий мавсумда учта ўйинда майдонга тушиб, учта гол уришга улгурди. У "Брюгге" сафида барча мусобақаларда жами 61 та учрашувда иштирок этиб, 26 та гол ва 9 та голли узатма муаллифи бўлган.