PRO-Liga 5-turidan o‘rin olgan «Paxtakor» FJ – «Metallurg» bahsidan (0:5) keyin bekobodliklar bosh murabbiyi Ilhom Mo‘minjonov matbuot anjumanida ishtirok etdi.

«Bugungi g‘alaba bilan muxlislarimizni, futbolchilarni va klubimiz rahbariyatini tabriklayman. Sekin-asta vazifani bajarib, o‘z maqsadimiz sari intilyapmiz. Eng quvonarlisi, futbolchilar o‘yindan o‘yinga qo‘shyapti. Jamoamiz borgan sari biz murabbiylar xohlagan futbolni namoyish etmoqda.

Futbolda o‘zi ketma-ket uch-to‘rtta o‘yinda yutish osonmas, bu futbolchilarga ruhan ta’sir qiladi. Menimcha, bugungi bahs boshlarida shu rol o‘ynadi. Oddiy misol «Sho‘rtan»ni olaylik, avvalgi turda qiyin raqibni mag‘lubiyatga uchratgandi, biroq bu turda «Yaypan» bilan durang o‘ynadi. «Sho‘rtan» yaxshi jamoa, lekin negadir kecha o‘yini chiqmadi.

Yashirmayman, klubimizda bosim ancha yuqori. Rahbariyat talabi katta. Buni bilib turib jamoani qabul qilib olganman. Biz murabbiylar o‘n oylik musobaqani stressda o‘tkazamiz. O‘z paytida «Neftchi»da ham shunday bo‘lgandi va bu menga yoqadi, bunga tayyorman. Ikkinchi davrada tarkibni yanada kuchaytirishni niyat qilganmiz».