Italiyaning «Inter» klubi hakamlik bilan bog‘liq mojaro sabab B seriyaga tushirib yuborilishi va ikki sovrindan mahrum qilinishi mumkin. Bu haqda AGI nashri xabar bermoqda.

Manba ma’lumotiga ko‘ra, Milan prokuraturasi Italiya hakamlar korpusi rahbari Janlukka Rokkini milanliklar o‘yinlariga «qulay» hakamlarni tayinlashda gumon qilmoqda. Tergov versiyasiga ko‘ra, Rokki shaxsan «Inter» manfaati yo‘lida muayyan hakamlarni tayinlashga erishgan.

Qayd etilishicha, agar ayblovlar tasdiqlansa, «Inter» 2023/2024 yilgi A Seriya chempionligi oltin medallaridan va 2024 yilgi Italiya Superkubogi g‘olibligidan mahrum qilinishi mumkin. Shuningdek, reglamentga ko‘ra, klubdan ochko olib tashlash yoki uni elita divizionidan to‘liq chiqarib yuborish ham nazarda tutilgan.

Avvalroq Milan prokuraturasi firibgarlik ishi bo‘yicha tergov boshlagani, shundan so‘ng A Seriya hakamlar kollegiyasining sobiq rahbari Janluka Rokka o‘z lavozimini tark etgani haqida xabarlar tarqalgan edi.