Chempionlar ligasi yarim finali doirasidagi «Bavariya» va «PSJ» o‘rtasidagi javob o‘yini oldidan nafaqat maydonda, balki uning tashqarisida ham jiddiy kurash avj oldi. Germaniya klubi rahbariyati parijliklarning myunxenliklar uchun «ona uyi»dek bo‘lib qolgan mehmonxonani band qilishga bo‘lgan urinishini to‘sib qo‘ydi.

Myunxenga tashrif oldidan «PSJ» vakillari Infinity mehmonxonasini band qilishga harakat qilishdi. Bu tanlov irim-sirimlar bilan bog‘liq edi: o‘tgan yili fransuz jamoasi aynan shu yerda to‘xtaganida Chempionlar ligasida g‘alaba qozongan edi.

Biroq Infinity mehmonxonasi «Alyans Arena»dan atigi 20 km uzoqlikda joylashgan va «Bavariya» uchun uy o‘yinlari oldidan an’anaviy qarorgoh hisoblanadi. Myunxenliklar uchun o‘z pozisiyalarini raqibga boy bermaslik prinsipial ahamiyatga ega edi.

«Bavariya» bosh murabbiyi Vensan Kompani va sport direktori Kristof Froynd vaziyatga keskin munosabat bildirishdi:

«Bu bizning shahar. Biz Infinity mehmonxonasida qolamiz. Biz o‘z qarorgohimizni topshirib qo‘ymaymiz. Bu bizning uy o‘yinimiz va bizning shahrimiz», — deb ta’kidladi murabbiylar shtabi.

Shu sababli, parijliklar Shvabinger Tordagi Andaz mehmonxonasida to‘xtashga majbur bo‘lishdi. Bu joy ham logistika jihatidan qulay bo‘lib, «Alyans Arena»ga olib boradigan A9 avtomagistrali yaqinida joylashgan.