Kataloniyaning «Barselona» klubi Ispaniyada chempionlik maqomini amalda naqd qilib bo‘ldi — katta ehtimol bilan bu keyingi turda, o‘z maydonida «Real»ga qarshi kechadigan bahsda rasmiylashtiriladi. Biroq kataloniyaliklarda yana bir qo‘shimcha motivasion omil mavjud: ular joriy mavsumda o‘z uylarida hali biror marta ochko yo‘qotishmadi. Birorta durang, birorta mag‘lubiyat yo‘q — o‘z maydonidagi barcha o‘yinlarda faqat g‘alaba qayd etilgan.
«Barselona» Ispaniya futboli tarixida butun bir chempionatni o‘z uyida hech qanday ochko yo‘qotmasdan yakunlagan ilk klubga aylanishi mumkin. Buning uchun ular «Real» va «Betis»ni mag‘lub etish kifoya. Shunda tarixiy natija qo‘lga kiritiladi.
