Ispaniya La Ligasining 35-turidan o‘rin olgan «Barselona» hamda «Real» o‘rtasidagi uchrashuv yakunlandi. Bellashuv Barselona shahridagi «Spotifay Kamp Nou» stadionida bo‘lib o‘tdi. Uchrashuvda mezbonlar 2:0 hisobida g‘alaba qozondi.

Uchrashuvdagi hisobni 9-daqiqada kataloniyaliklar hujumchisi Markus Reshford ochdi. U jarima maydonchasi tashqarisidan o‘ta aniq zarba yo‘llab, to‘pni darvozaning yuqori burchagiga joylab qo‘ydi.

Oradan to‘qqiz daqiqa o‘tib Ferran Torres jamoasining ustunligini mustahkamladi va o‘yinga yakuniy nuqtani qo‘ydi — 2:0.

Ikkinchi bo‘limda "Barsa" o‘yin sur’atini pasaytirdi va katta tavakkal qilmadi. Shunga qaramay, jamoa golli vaziyatlarni yaratdi, ammo ulardan foydalana olmadi.

Ushbu g‘alabadan keyin «Barselona» muddatidan avval Ispaniya chempionligini rasman ta’minladi. Jamoa 91 ochko bilan musobaqa jadvalida peshqadam bo‘lib turibdi. «Real» esa 77 ochko bilan ikkinchi pog‘onadan joy olgan. Mavsum tugashiga yana uch tur qoldi.

Shu tariqa, «Barselona» o‘z tarixida 29-marta Ispaniya chempioniga aylandi.

Keyingi turda Xans-Diter Flik shogirdlari 13 may kuni safarda «Alaves»ga qarshi maydonga tushadi. Alvaro Arbeloa boshqarayotgan «Real» esa bir kundan keyin o‘z maydonida «Ovyedo»ni qabul qiladi.

Ispaniya — La Liga. 35-tur
2026 yil 10 may, yakshanba.
«Barselona» — «Real» 2:0
Gollar: Markus Reshford 9, Ferran Torres 18.