Fred Ryutten Jahon chempionati boshlanishiga bir oy qolganda Kyurasao terma jamoasi bosh murabbiyligidan iste’foga chiqdi. Bu haqda Kyurasao futbol federasiyasi (FFK) matbuot xizmati xabar bermoqda.
Qayd etilishicha, 63 yoshli mutaxassis jamoadagi ichki nizolar fonida shunday qarorga kelgan: futbolchilar va homiylar terma jamoani o‘z tarixida ilk bor Jahon chempionatiga olib chiqqan Dik Advokatni lavozimiga qaytarishni talab qilishgan.
«O‘yinchilar va xodimlar o‘rtasidagi sog‘lom professional munosabatlarga putur yetkazadigan muhit yuzaga kelishiga yo‘l qo‘yib bo‘lmaydi. Bu vaziyatda ortga qadam tashlash oqilona qarordir. Vaqt kutib turmaydi, Kyurasao esa oldinga harakat qilishi kerak», — dedi Ryutten.
Eslatib o‘tamiz, 78 yoshli Dik Advokat shu yilning fevral oyida qizining sog‘lig‘idagi jiddiy muammolar sababli Kyurasao bosh murabbiyligidan ketgan edi. Niderlandiya OAVlarining xabariga ko‘ra, qizining ahvoli yaxshilangani bois tajribali murabbiy ishga qaytishga tayyor.
JCH-2026 guruh bosqichida Kyurasao terma jamoasi Germaniya, Ekvador va Kot-d'Ivuar bilan kuch sinashadi.
