«Barselona» bosh murabbiyi Xans-Diter Flik La Liganing 36-turidan o‘rin olgan «Alaves»ga qarshi bahsda (0:1) ilk bor asosiy tarkibda maydonga tushgan Alvaro Kortesning o‘yiniga baho berdi. Kataloniyaliklarning yoshlar jamoasi sardori bo‘lgan Kortes markaziy himoyada harakat qildi.
Germaniyalik mutaxassis mag‘lubiyatga qaramay, yosh himoyachining harakatlaridan qoniqish hosil qilganini ta’kidladi.
«Kortes o‘zini juda yaxshi ko‘rsatmoqda. U so‘nggi vaqtlarda sezilarli darajada o‘sdi. Ayniqsa, uning havodagi kurashlardagi o‘yini meni juda quvontirdi. O‘yindan oldin Alvaroga xuddi mashg‘ulotlardagidek o‘ynashini aytgandim. Men yosh futbolchilardan aynan shuni kutaman», — deya Flikning so‘zlarini keltiradi Barca Universal.
Ma’lumot uchun, Alvaro Kortes shu yilning mart oyida 21 yoshini qarshi oldi. Uning «Barselona» bilan amaldagi shartnomasi 2028 yilgacha mo‘ljallangan. «Alaves»ga qarshi bahs u uchun asosiy jamoadagi debyut o‘yin sifatida tarixda qoldi.
