Frank Kessining Italiya chempionatiga qaytishi haqidagi mish-mishlar hali mart oyidayoq paydo bo‘lgan edi.

Eslatib o‘tamiz, u ilgari "Atalanta" va "Milan" klublarida muvaffaqiyatli to‘p surgan, "rossonerilar" bilan hatto mamlakat chempioniga ham aylangandi. O‘shanda mish-mishlar Kessini "Yuventus"ga yo‘llayotgan bo‘lsa, endilikda "Roma" varianti ancha realroq ekani oydinlashdi.

Gap shundaki, Rim klubini ayni damda futbolchining qobiliyatlarini juda yaxshi biladigan Djan Pyero Gasperini boshqarmoqda. U Kessi bilan "Atalanta"da birga ishlagan va uni yana o‘z jamoasida ko‘rishni istaydi.

Biroq Kessining moliyaviy talablari bu transferga muammo tug‘dirishi mumkin. Hozirda u Yaqin Sharqda yaxshigina maosh olmoqda va katta Yevropa futboliga qaytish istiqboli uchun ham o‘z maoshining sezilarli darajada kamayishiga rozi emas.