Франк Кессининг Италия чемпионатига қайтиши ҳақидаги миш-мишлар ҳали март ойидаёқ пайдо бўлган эди.
Эслатиб ўтамиз, у илгари "Аталанта" ва "Милан" клубларида муваффақиятли тўп сурган, "россонерилар" билан ҳатто мамлакат чемпионига ҳам айланганди. Ўшанда миш-мишлар Кессини "Ювентус"га йўллаётган бўлса, эндиликда "Рома" варианти анча реалроқ экани ойдинлашди.
Гап шундаки, Рим клубини айни дамда футболчининг қобилиятларини жуда яхши биладиган Джан Пьеро Гасперини бошқармоқда. У Кесси билан "Аталанта"да бирга ишлаган ва уни яна ўз жамоасида кўришни истайди.
Бироқ Кессининг молиявий талаблари бу трансферга муаммо туғдириши мумкин. Ҳозирда у Яқин Шарқда яхшигина маош олмоқда ва катта Европа футболига қайтиш истиқболи учун ҳам ўз маошининг сезиларли даражада камайишига рози эмас.
