«Барселона» бўлажак телерадиоэшиттириш ҳуқуқларидан тушадиган даромадлар эвазига 210 миллион евро миқдорида кредит олиб, ўз молиявий ресурсларини кенгайтирди. Бу ҳақда Mundo Deportivo хабар бермоқда.
Нашр маълумотларига кўра, клуб 105 миллион еврони жорий йилнинг июль ойида, қолган 105 миллионни эса ноябрь ойида олади. «Барселона» таъкидлашича, бу маблағ трансфер бозорида янада ишончлироқ ишлашга, шунингдек, иш ҳақини тўлаш бўйича мажбуриятларни бажаришга имкон беради.
Маблағ жалб қилиш зарурати Espai Barça лойиҳасини амалга оширишдаги кечикишлар билан боғлиқ. Муддатлар сурилгани сабабли, режалаштирилган даромадларнинг бир қисми, жумладан, янгиланган стадиондаги VIP-ҳудудлардан тушумлар ҳали кела бошлагани йўқ, бироқ лойиҳа билан боғлиқ тўловлар аллақачон амалга оширилмоқда.
Халқаро Morningstar DBRS агентлиги «Барселона»нинг кредит рейтингини BBB даражасида тасдиқлади, аммо қарз юкининг ортиши кутилаётгани сабабли прогноз рейтингини «ижобий»дан «барқарор»га ўзгартирди.
