Бугун, 9 июль куни футбол бўйича 2026 йилги жаҳон чемпионатининг 1/4 финал доирасида Франция ва Марокаш терма жамоалари тўқнаш келишади. Учрашувни Факундо Тельо (Аргентина) бошчилигидаги ҳакамлар бригадаси бошқариб боради. Ўйин Тошкент вақти билан соат 23:00 да бошланади. «Stadion.uz» сариқ карточкалар сони ошиб кетгани сабабли, кейинги босқичда дисквалификация хавфи остида қолган Франция терма жамоаси ўйинчилари рўйхати билан танишишни таклиф қилади.
Францияликлар таркибида уч нафар футболчи дисквалификация хавфи остида: таянч ярим ҳимоячиси Ману Коне, шунингдек, вингерлар Майкл Олисе ва Брэдли Баркола. Агар Марокашга қарши ўйинда ушбу футболчилардан биронтаси сариқ карточка олса, у ярим финалда майдонга туша олмайди.
2026 йилги жаҳон чемпионати 11 июндан 19 июлга қадар АҚШ, Канада ва Мексикада бўлиб ўтмоқда. Амалдаги жаҳон чемпиони — Аргентина терма жамоаси. 2022 йилда Қатарда бўлиб ўтган турнир финалида улар Франция терма жамоасини пенальтилар сериясида 4:2 (асосий вақт 3:3) ҳисобида мағлуб этганди.
