АҚШ, Канада ва Мексика майдонларида ўтаётган Жаҳон чемпионатининг илк ярим финалчиси маълум бўлди. Чорак финал босқичи доирасида Франсия ҳамда Марокаш терма жамоалари ўртасидаги баҳс якунланди. АҚШнинг Фоксборо шаҳридаги «Жиллетт» стадионида ўтган учрашувда аргентиналик ҳакам Факундо Тело бошчилик қилди.

Учрашув «уч ранглилар»нинг 2:0 ҳисобидаги ишончли ғалабаси билан якунланди.

Ўйиннинг 28-дақиқасида Франсия терма жамоаси етакчиси Килиан Мбаппе пеналтидан унумли фойдалана олмади — унинг зарбасини Марокаш дарвозабони қайтарди. Шунга қарамай, франсузлар босимни давом эттиришди ва 60-дақиқага келиб жамоа сардори ҳисобни очишга муваффақ бўлди.

Орадан олти дақиқа ўтиб, Усмон Дембеле Килиан Мбаппенинг ажойиб узатмасидан унумли фойдаланиб, «уч ранглилар»нинг устунлигини мустаҳкамлади — 2:0.

Шу тариқа, Марокаш терма жамоасининг чемпионатдаги юришига чек қўйилди. Франсия эса ярим финалга йўл олган биринчи жамоага айланди. Амалдаги чемпионлар финал йўлланмаси учун бугун, 10-июл куни бўлиб ўтадиган Испания — Белгия учрашуви ғолиби билан куч синашишади.