«Arsenal» va «PSJ» ishtirokidagi Chempionlar ligasining bo‘lajak finali oxirgi 30 yildan ortiq vaqt ichida ilk bor Buyuk Britaniyada bepul namoyish etilmaydi. Bu haqda The Guardian nashri xabar bermoqda.

Uchrashuv faqat pullik obuna orqali kirish mumkin bo‘lgan TNT Sports va HBO Max platformalarida eksklyuziv tarzda ko‘rsatiladi. Xuddi shunday model joriy mavsumdagi boshqa yevrokubok finallariga ham tatbiq etiladi: «Aston Villa» va «Frayburg» o‘rtasidagi Yevropa ligasi finali hamda «Kristal Pelas» va «Rayo Valyekano» to‘qnash keladigan Konferensiyalar ligasi finali ham pullik bo‘ladi.

Nashrning ma’lumotlariga ko‘ra, TNT Sports telekanalining bu qarori UYEFAning noroziligiga sabab bo‘lgan. Tashkilotdagilar bu qaror final o‘yinlariga bepul kirishni ta’minlash uchun «maksimal harakat» qilinishi kerakligi ko‘rsatilgan kelishuv ruhiga zid deb hisoblashmoqda.

Bundan avval Buyuk Britaniyadagi huquq egalari Yevropa kuboklari finallarini bepul translyasiya qilishardi. TNT Sports translyasiya huquqini qo‘lga kiritgach, dastlab alohida servis orqali o‘yinlarni vaqtincha bepul ko‘rish imkoniyatini taqdim etgan edi, biroq Buyuk Britaniyada HBO Max ishga tushirilganidan keyin bu imkoniyat bekor qilindi.