La Liga prezidenti Xavyer Tebas Florentino Peresning «Real»dan chempionlik unvonlari o‘g‘irlangani borasidagi bayonotlariga munosabat bildirdi. Avvalroq «qaymoqranglilar» prezidenti hakamlik haqida gapira turib: «Menda 7 ta chempionlik tituli bor, aslida 14 ta bo‘lishi mumkin edi — qolganlarini mendan o‘g‘irlashdi. Biz ushbu mavsumda bizdan tortib olingan 18 ochko haqida video tayyorladik», — deb aytgan edi.
— Madridista sifatida, «Real»dan yettita chempionlik tituli o‘g‘irlangan deb hisoblaysizmi?
— Yo‘q. Men bunday deb hisoblamayman, chunki bu unday emas, bu haqiqatga to‘g‘ri kelmaydi. Kundan-kunga sahifalari ko‘payib borayotgan o‘sha 500 sahifalik hisobotni ko‘rishni juda xohlayman. Hammasini ko‘rishni istayman. Va ko‘rganimda... Bizda ham hisobot bor, mayli u 500 sahifa bo‘lmasa ham, lekin gap shundaki, bu gaplar yolg‘on.
Ha, haqiqatan ham bir klub hakamlar tayinlanishiga ta’sir o‘tkazishga harakat qilgan, ammo shundan keyin o‘yinlar qanday kechganiga qarab, klubdan titullar o‘g‘irlandi deyish — bu noto‘g‘ri. Odamlarni aldash mumkin emas, bu voqelikka mos kelmaydi», — dedi Tebas.
Eslatib o‘tamiz, «Barselona» va uning rahbariyati Ispaniya Qirollik futbol federasiyasida (RFEF) ishlagan Negreyraga to‘lovlar amalga oshirilgani bo‘yicha poraxo‘rlikda ayblangan edi.
