Ла Лига президенти Хавьер Тебас Флорентино Переснинг «Реал»дан чемпионлик унвонлари ўғирлангани борасидаги баёнотларига муносабат билдирди. Аввалроқ «қаймоқранглилар» президенти ҳакамлик ҳақида гапира туриб: «Менда 7 та чемпионлик титули бор, аслида 14 та бўлиши мумкин эди — қолганларини мендан ўғирлашди. Биз ушбу мавсумда биздан тортиб олинган 18 очко ҳақида видео тайёрладик», — деб айтган эди.

— Мадридиста сифатида, «Реал»дан еттита чемпионлик титули ўғирланган деб ҳисоблайсизми?

— Йўқ. Мен бундай деб ҳисобламайман, чунки бу ундай эмас, бу ҳақиқатга тўғри келмайди. Кундан-кунга саҳифалари кўпайиб бораётган ўша 500 саҳифалик ҳисоботни кўришни жуда хоҳлайман. Ҳаммасини кўришни истайман. Ва кўрганимда... Бизда ҳам ҳисобот бор, майли у 500 саҳифа бўлмаса ҳам, лекин гап шундаки, бу гаплар ёлғон.

Ҳа, ҳақиқатан ҳам бир клуб ҳакамлар тайинланишига таъсир ўтказишга ҳаракат қилган, аммо шундан кейин ўйинлар қандай кечганига қараб, клубдан титуллар ўғирланди дейиш — бу нотўғри. Одамларни алдаш мумкин эмас, бу воқеликка мос келмайди», — деди Тебас.

Эслатиб ўтамиз, «Барселона» ва унинг раҳбарияти Испания Қироллик футбол федерациясида (RFEF) ишлаган Негрейрага тўловлар амалга оширилгани бўйича порахўрликда айбланган эди.