«Nyukasl Yunayted» bosh murabbiyi Eddi Xau hujumchi Entoni Gordonning «Barselona»ga transferi haqida gapirdi. OAV ma’lumotlariga ko‘ra, ingliz klubi ushbu o‘tish uchun 80 million yevrogacha mablag‘ olishi mumkin.
«Entonini yo‘qotganimizdan xafa bo‘lsak-da, bu uning uchun katta imkoniyat ekanligini tushunamiz. U so‘nggi yillardagi muvaffaqiyatlarimizning muhim qismi bo‘ldi. «Nyukasl»da o‘ynab yurgan vaqtida Angliya terma jamoasi a’zosiga aylangani uning rivojlanishi yo‘lida qilgan mehnatlari va klubdagilarning qo‘llab-quvvatlashi natijasidir.
U bizning eng ezgu tilaklarimiz bilan ketmoqda. Ishonchim komilki, u «Barselona»da ham, bu yilgi Jahon chempionatida terma jamoa safida ham muvaffaqiyatlarga erishadi», — dedi Xau klub rasmiy saytiga.
Mavsum yakunlariga ko‘ra, Gordon «Nyukasl» safida barcha turnirlarda 46 ta o‘yinda maydonga tushib, 17 ta gol va 5 ta golli uzatmaga mualliflik qildi. Transfermarkt portali futbolchining qiymatini 60 million yevroga baholamoqda.
