Myunxenning «Bavariya» klubi prezidenti Gerbert Xayner jamoa qanot hujumchisi Maykl Olisega Madridning «Real» klubi qiziqish bildirayotgani haqida tarqalgan xabarlarga munosabat bildirdi.
Xaynerning ta’kidlashicha, «Bavariya» hech qanday bosim ostida o‘z futbolchilarini sotishga majbur emas va transfer masalalarida mustaqil qaror qabul qiladi.
«Ishonchim komilki, «Bavariya» futbolchilarini sotishga majbur bo‘ladigan klub emas. Biz barcha qarorlarni kuchli pozisiyadan turib qabul qilamiz», — dedi Xayner Bild TV telekanaliga bergan intervyusida.
Myunxen klubi prezidenti Olisening 2029 yilga qadar amal qiladigan shartnomasiga ham to‘xtalib, fransiyalik futbolchi jamoada yanada uzoqroq qolishiga umid bildirdi.
«U shartnomasini uzaytiradi, deb umid qilaman», — deya qo‘shimcha qildi Xayner.
Eslatib o‘tamiz, Maykl Olise 2024 yilda Angliyaning «Kristal Pelas» klubidan «Bavariya»ga o‘tgan edi. Shundan buyon u myunxenliklar hujum chizig‘ining asosiy futbolchilaridan biriga aylandi.
«Real»ning qiziqishi haqidagi xabarlarga qaramay, «Bavariya» 24 yoshli fransuz futbolchisini o‘z safida saqlab qolish niyatida qat’iy turibdi.
