Ispaniyaning «Barselona» va Angliyaning «Manchester Siti» klublari Norvegiyaning «Budyo-Glimt» jamoasiga tegishli bo‘lgan 17 yoshli hujumchi Mikkel Broning harakatlarini diqqat bilan kuzatib borishmoqda. Insayder Rudi Galettining X ijtimoiy tarmog‘ida xabar berishicha, futbolchiga Italiyaning «Yuventus» va Niderlandiyaning «Ayaks» klublari ham da’vogarlik qilmoqda.
Manbaning ta’kidlashicha, shu yilning yanvar oyida «Nyukasl» daniyalik futbolchini sotib olish bo‘yicha taklif bilan chiqqan edi. O‘shanda «Budyo-Glimt» o‘yinchini sotishni rad etgan. «Qarg‘alar»ning Broga bo‘lgan qiziqishi hamon saqlanib qolgani aytilmoqda.
Mikkel Bro 2025 yilning fevral oyida Daniyaning «Orxus» klubidan «Budyo-Glimt» safiga kelib qo‘shilgan edi. U Daniyaning 17 yoshgacha bo‘lgan terma jamoasi safida 15 ta o‘yinda maydonga tushib, 12 ta gol urdi va 2 ta golli uzatmani amalga oshirdi. Hujumchi ushbu terma jamoa sardori hisoblanadi.
