Polshada muxlislar Ukraina terma jamoasi madhiyasi va o‘yinchilariga nisbatan norozilik bildirdi

31may, yakshanba kuni Vroslav shahrida Polsha va Ukraina terma jamoalari o‘rtasida o‘rtoqlik uchrashuvi bo‘lib o‘tdi. O‘yin oldidan stadionda Ukraina davlat madhiyasi yangraganda, shuningdek, diktor ukrainalik futbolchilarning ism-sharifini e’lon qilayotganda polshalik ishqibozlar ommaviy ravishda hushtak chalib, o‘z noroziliklarini bildirishdi.

Bunga so‘nggi kunlarda ikki davlat o‘rtasida yuzaga kelgan siyosiy kelishmovchiliklar sabab bo‘lgan. Yaqinda Ukraina prezidenti Vladimir Zelenskiy harbiylarning maxsus bo‘linmasiga “Ukraina isyonchilar armiyasi (UPA) qahramonlari” nomini bergan edi.

Bunga javoban Polshaning sobiq prezidenti Lex Valensa ko‘kragiga taqib yurgan Ukraina bayroqchasini yechib tashlaganini va endi Zelenskiyni qo‘llab-quvvatlamasligini ma’lum qildi. Polsha rahbari Karol Navroskiy esa Ukraina bunday qarorlari bilan Yevropa Ittifoqiga a’zo bo‘lishga ma’naviy jihatdan tayyor emasligini isbotlaganini ta’kidladi.

Ma’lumot uchun, Ukraina isyonchilar armiyasi (UPA) Ikkinchi jahon urushi yillarida gitlerchilar bilan hamkorlik qilgan guruh hisoblanadi. Bu tashkilot ko‘plab qirg‘inlarda, xususan, 1943-yilda Volin hududida minglab polyaklarning ommaviy o‘ldirilishida (tarixda “Volin qirg‘ini” deb nomlanadi) ayblanadi. Shuningdek, o‘sha paytda ular bilan hamkorlik qilishni xohlamagan minglab ukrainaliklar ham ularning qurboniga aylangan.