Kathimerini nashri xabariga ko‘ra, Gresiya terma jamoasining sobiq himoyachisi Marios Ikonomu avtohalokat oqibatlari tufayli 33 yoshida vafot etdi.
Manbaga ko‘ra, futbolchi 23 may kuni sodir bo‘lgan avariyadan so‘ng Yanina shahridagi shifoxonaning jonlantirish bo‘limida bir necha kun davomida davolangan. Ikonomu motosiklining mashina bilan to‘qnashuvi natijasida og‘ir tan jarohatlari olgan edi.
Ikonomu professional faoliyatini Gresiyaning Yanina shahridagi PAS klubida boshlagan. Keyinchalik u Italiyaning «Kalyari», «Bolonya», SPAL, «Bari» va «Sampdoriya» klublarida, shuningdek, Gresiyaning AYEK safida to‘p surgan.
Himoyachi Gresiya milliy terma jamoasi safida oltita o‘yin o‘tkazgan.
Ikonomu 2024 yilda professional faoliyatini yakunlagan edi.
