Kathimerini нашри хабарига кўра, Греция терма жамоасининг собиқ ҳимоячиси Мариос Иконому автоҳалокат оқибатлари туфайли 33 ёшида вафот этди.

Манбага кўра, футболчи 23 май куни содир бўлган авариядан сўнг Янина шаҳридаги шифохонанинг жонлантириш бўлимида бир неча кун давомида даволанган. Иконому мотоциклининг машина билан тўқнашуви натижасида оғир тан жароҳатлари олган эди.

Иконому профессионал фаолиятини Грециянинг Янина шаҳридаги ПАС клубида бошлаган. Кейинчалик у Италиянинг «Кальяри», «Болонья», СПАЛ, «Бари» ва «Сампдория» клубларида, шунингдек, Грециянинг АЕК сафида тўп сурган.

Ҳимоячи Греция миллий терма жамоаси сафида олтита ўйин ўтказган.

Иконому 2024 йилда профессионал фаолиятини якунлаган эди.