Daniya terma jamoasi shifokori Morten Boyesen milliy jamoa yarim himoyachisi Kristian Eriksenning sog‘lig‘i borasidagi so‘nggi ma’lumotlar bilan o‘rtoqlashdi. «Volfsburg» klubi futbolchisining ahvoli haqidagi xabar Daniya futbol ittifoqining ijtimoiy tarmoqlarida e’lon qilindi.

Shanba kuni 34 yoshli yarim himoyachi Ukraina terma jamoasiga qarshi o‘tkazilgan o‘rtoqlik uchrashuvi paytida hushini yo‘qotgan edi.

«Bugun ertalab Eriksen bilan gaplashdim. Uning ahvoli yaxshi. U oilasi davrasida va kayfiyati a’lo darajada. Tez orada unga shifoxonadan javob berilishini va u uyiga qayta olishini kutmoqdamiz», — dedi shifokor.

Eslatib o‘tamiz, 2021 yilda Yevropa chempionatida yuz bergan xuddi shunday holatdan so‘ng Eriksenga kardiostimulyator (yurak urishini nazorat qiluvchi qurilma) o‘rnatilgan edi.