Germaniya terma jamoasi yarim himoyachisi Yozua Kimmix Ispaniyaning Kabo-Verde bilan durangiga munosabat bildirib, kichik terma jamoalarni yutish ancha murakkablashganini aytdi. Ispaniya va Kabo-Verde o‘rtasidagi JCH-2026 guruh bosqichi birinchi tur uchrashuvi 0:0 hisobida yakunlandi.
«Umuman olganda, o‘yinlarda g‘alaba qozonish tobora qiyinlashmoqda. «Kichik» deb ataluvchi davlatlar ham futbol, ham taktika jihatidan yaxshilanib borishyapti. Kyurasao bizga qarshi chindan ham futbol o‘ynadi. Gaiti ham Shotlandiyaga qarshi yaxshi o‘yin ko‘rsatdi. Endi avvalgidek oson emas.
Kattaroq terma jamoalar bunday o‘yinlarda g‘alaba qozonish uchun yanada yaxshiroq harakat qilishlari kerak. Bu Kyurasao ustidan qozonilgan 7:1 hisobidagi g‘alabamiz tasodif emasligini ko‘rsatadi. Buning uchun mehnat qilish lozim», – dedi Kimmix.
