AQSH hukumati Eron milliy terma jamoasining Jahon chempionati doirasidagi Los-Anjeles va Sietl shaharlarida o‘tadigan o‘yinlari uchun joriy qilingan cheklovlarini yumshatish niyatida emas. Eron tomoni ushbu holat bo‘yicha FIFA’ga shikoyat qilishini aytgan bo‘lsa-da, mezbon mamlakatning turnir bo‘yicha yuqori martabali rasmiysi qoidalar o‘zgarishsiz qolishini tasdiqladi.

Reuters nashrining xabar berishicha, Oq uyning Jahon chempionati bo‘yicha tezkor ishchi guruhi ijrochi direktori Endryu Juliani 20 iyun, shanba kuni AQSH Eron tarkibining sayohat rejasini kuzatishda davom etishini, biroq hozircha dastlabki reja o‘z kuchida qolishini ma’lum qilgan.

Eronliklar amaldagi qat’iy cheklovlardan keskin norozi. Unga ko‘ra, terma jamoa o‘yin o‘tkaziladigan hududga uchrashuvdan maksimal 24 soat oldin yetib kelishi va o‘yin yakunlanishi bilanoq to‘g‘ridan to‘g‘ri Meksikaning Tixuana shahridagi bazasiga qaytib ketishi shart.  21 iyun, yakshanba kuni Los-Anjelesda Belgiya terma jamoasiga qarshi kechadigan bahsda ham aynan shu protokoli amal qiladi. Eron terma jamoasi o‘yindan taxminan 24 soat oldin, shanba oqshomida shaharga yetib kelishi belgilangan.

Ma’lumot uchun, Jahon chempionati 2-turidan o‘rin olgan Eron hamda Belgiya terma jamoalari o‘rtasidagi bellashuv 21 iyundan 22 iyunga o‘tar kechasi bo‘lib o‘tadi. Uchrashuv O‘zbekiston vaqti bilan 00:00 da boshlanadi.