Kabo-Verde terma jamoasi darvozaboni Vozinya Instagram ijtimoiy tarmog‘ida obunachilar soni bo‘yicha o‘z ampluasidagi futbolchilar orasida birinchi o‘ringa chiqdi.

Jahon chempionati 1/16 finalida Argentina terma jamoasiga qarshi kechgan uchrashuvdan (qo‘shimcha bo‘limlardan so‘ng 2:3) keyin Vozinyaning akkauntiga 22,3 million kishi obuna bo‘ldi. Avvaliga u 2026 yilgi Jahon chempionatida ishtirok etayotgan darvozabonlar orasida rekord o‘rnatib, Belgiya terma jamoasi posboni Tibo Kurtuaning (18 million) natijasini ortda qoldirdi. Shundan so‘ng faoliyatini yakunlagan darvozabonlar ham hisobga olingan umumiy reytingda Ispaniya terma jamoasi safida jahon chempioni bo‘lgan Iker Kasilyasni (20,4 million) ham ortda qoldirib, birinchi o‘ringa ko‘tarildi.

Turnir boshlanishidan oldin afrikalik futbolchining akkauntiga qariyb 50 ming kishi obuna bo‘lgan edi. Uning auditoriyasi guruh bosqichidagi Ispaniyaga qarshi ilk o‘yindan (0:0) so‘ng keskin osha boshladi. Aynan shu uchrashuvdan keyin Vozinyaga 10 milliondan ortiq yangi obunachi qo‘shildi.

40 yoshli Vozinya Portugaliya ikkinchi divizionida ishtirok etuvchi “Shavish” klubi sharafini himoya qiladi. Transfermarkt portaliga ko‘ra, uning transfer qiymati 50 ming yevroga baholanadi. U faoliyati davomida Portugaliyaning “Jil Visente”, Moldovaning “Zimbru”, Kiprning “AEL” hamda Slovakiyaning “Trenchin” klublarida ham o‘ynagan.