Кабо-Верде терма жамоаси дарвозабони Возинья Instagram ижтимоий тармоғида обуначилар сони бўйича ўз амплуасидаги футболчилар орасида биринчи ўринга чиқди.

Жаҳон чемпионати 1/16 финалида Аргентина терма жамоасига қарши кечган учрашувдан (қўшимча бўлимлардан сўнг 2:3) кейин Возиньянинг аккаунтига 22,3 миллион киши обуна бўлди. Аввалига у 2026 йилги Жаҳон чемпионатида иштирок этаётган дарвозабонлар орасида рекорд ўрнатиб, Бельгия терма жамоаси посбони Тибо Куртуанинг (18 миллион) натижасини ортда қолдирди. Шундан сўнг фаолиятини якунлаган дарвозабонлар ҳам ҳисобга олинган умумий рейтингда Испания терма жамоаси сафида жаҳон чемпиони бўлган Икер Касилясни (20,4 миллион) ҳам ортда қолдириб, биринчи ўринга кўтарилди.

Турнир бошланишидан олдин африкалик футболчининг аккаунтига қарийб 50 минг киши обуна бўлган эди. Унинг аудиторияси гуруҳ босқичидаги Испанияга қарши илк ўйиндан (0:0) сўнг кескин оша бошлади. Айнан шу учрашувдан кейин Возиняга 10 миллиондан ортиқ янги обуначи қўшилди.

40 ёшли Возинья Португалия иккинчи дивизионида иштирок этувчи “Шавиш” клуби шарафини ҳимоя қилади. Transfermarkt порталига кўра, унинг трансфер қиймати 50 минг еврога баҳоланади. У фаолияти давомида Португалиянинг “Жил Висенте”, Молдованинг “Зимбру”, Кипрнинг “АЭЛ” ҳамда Словакиянинг “Тренчин” клубларида ҳам ўйнаган.