«Tottenxem»ning yangi a’zosi Sandro Tonali «Nyukasl»dan londonliklar safiga o‘tgani haqida o‘z fikrlari bilan o‘rtoqlashdi. Bundan oldin «shporlar» matbuot xizmati 26 yoshli futbolchining transferini rasman e’lon qilgan edi.

«Bu yerda ekanimdan juda xursandman. Bugun bu yerga kelganimda uzoq vaqt davomida ajoyib tuyg‘ularni his qildim. Bosh murabbiy bilan deyarli ikki soat davomida klub, muxlislar, stadion va o‘yin uslubimiz haqida gaplashdik. Bu xuddi ertakka o‘xshardi. «Tottenxem» bilan shartnoma imzolashim kerakligini darhol anglab yetdim. Ilgari «Tottenxem»ga qarshi bir necha bor o‘ynaganman va stadiondagi ajoyib muhitni doim his qilganman. Mavsum boshlanishini intiqlik bilan kutyapman», — deya Tonalining so‘zlarini keltiradi klub matbuot xizmati.

O‘tgan mavsum yakunlariga ko‘ra, «Tottenxem» Angliya Premyer-ligasi turnir jadvalida 17-o‘rinni egallab, elitada qolishni uddalagan edi.