O‘zbekistonlik UFC jangchisi Bogdan Guskov UFC‘dagi navbatdagi jangini sobiq chempion, rossiyalik Magomed Ankalayevga qarshi o‘tkazadi. Bu haqda tashkilot matbuot xizmati xabar berdi.
Qayd etilishicha, Xalil Rountri jarohati sabab UFC Abu-Dabi turnirining markaziy jangida ishtirok eta olmaydi. Ushbu turnirga 25 iyul kuni “Etihad” arena mezbonlik qiladi.
“Uning o‘rniga yarim og‘ir vazn toifasida UFC reytingining 1-raqamli jangchisi Magomed Ankalayevga qarshi O‘zbekistonning eng yuqori reytingli vakili, divizionning 10-raqamli jangchisi Bogdan Guskov oktagonga chiqadi. Hisobida 18 ta g‘alaba va 18 ta muddatidan avval yakunlangan jang mavjud bo‘lgan Guskov ulardan 13 tasini birinchi raundning o‘zida yakunlagan. O‘zbekistonlik jangchi sobiq chempion Ankalayevga qarshi kechadigan ushbu muhim yarim og‘ir vazn toifasidagi bahsda UFC’dagi ilk “main event” jangida o‘z imkoniyatini namoyish etishga harakat qiladi”, deyiladi xabarda.
Bogdan Guskov oxirgi jangini 2025 yil dekabr oyida UFC 323 turniri doirasida Yan Blaxovichga qarshi o‘tkazgan. Mazkur bahs durang natija bilan yakunlangan. Ular o‘rtasidagi revansh jangi 1 avgust kuni bo‘lib o‘tadigan UFC Fight Night turniriga belgilangan. O‘zbekistonlik sportchi UFC promousheni doirasida hozirga qadar jami 6 ta jang o‘tkazib, shulardan 4 tasida g‘alaba qozongan, bittadan durang va mag‘lubiyat qayd etgan.
Uning navbatdagi raqibi, sobiq chempion Magomed Ankalayev, oxirgi jangini 2025 yil oktyabr oyida o‘tkazgan. U UFC 320 turnirida Aleks Pereyraga qarshi oktagonga chiqib, birinchi raundda texnik nokaut evaziga g‘alaba qozongan va chempionlik kamarini qo‘lga kiritgan. Ankalayev faoliyati davomida 24 marta oktagonga chiqib, shularning 20 tasida g‘alaba qozongan, 2 bor mag‘lub bo‘lgan, 1 jangda aynan Yan Blaxovich bilan durang qayd etgan. Uning yana bir jangi natijasi bekor qilingan.
