Ўзбекистонлик UFC жангчиси Богдан Гусков UFC‘даги навбатдаги жангини собиқ чемпион, россиялик Магомед Анкалаевга қарши ўтказади. Бу ҳақда ташкилот матбуот хизмати хабар берди.

Қайд этилишича, Халил Роунтри жароҳати сабаб UFC Абу-Даби турнирининг марказий жангида иштирок эта олмайди. Ушбу турнирга 25 июль куни “Etihad” арена мезбонлик қилади.

“Унинг ўрнига ярим оғир вазн тоифасида UFC рейтингининг 1-рақамли жангчиси Магомед Анкалаевга қарши Ўзбекистоннинг энг юқори рейтингли вакили, дивизионнинг 10-рақамли жангчиси Богдан Гусков октагонга чиқади. Ҳисобида 18 та ғалаба ва 18 та муддатидан аввал якунланган жанг мавжуд бўлган Гусков улардан 13 тасини биринчи раунднинг ўзида якунлаган. Ўзбекистонлик жангчи собиқ чемпион Анкалаевга қарши кечадиган ушбу муҳим ярим оғир вазн тоифасидаги баҳсда UFC’даги илк “маин эвент” жангида ўз имкониятини намойиш этишга ҳаракат қилади”, дейилади хабарда.

Богдан Гусков охирги жангини 2025 йил декабрь ойида UFC 323 турнири доирасида Ян Блаховичга қарши ўтказган. Мазкур баҳс дуранг натижа билан якунланган. Улар ўртасидаги реванш жанги 1 август куни бўлиб ўтадиган UFC Fight Night турнирига белгиланган. Ўзбекистонлик спортчи UFC промоушени доирасида ҳозирга қадар жами 6 та жанг ўтказиб, шулардан 4 тасида ғалаба қозонган, биттадан дуранг ва мағлубият қайд этган.

Унинг навбатдаги рақиби, собиқ чемпион Магомед Анкалаев, охирги жангини 2025 йил октябрь ойида ўтказган. У UFC 320 турнирида Алекс Перейрага қарши октагонга чиқиб, биринчи раундда техник нокаут эвазига ғалаба қозонган ва чемпионлик камарини қўлга киритган. Анкалаев фаолияти давомида 24 марта октагонга чиқиб, шуларнинг 20 тасида ғалаба қозонган, 2 бор мағлуб бўлган, 1 жангда айнан Ян Блахович билан дуранг қайд этган. Унинг яна бир жанги натижаси бекор қилинган.