FIFA avgust oyi o‘rtalariga qadar Jahon chempionati ishtirokchilari sonini 48 tadan 64 ta terma jamoagacha oshirish borasida yakuniy to‘xtamga kelishni mo‘ljallamoqda.

Bu haqda tashkilot hujjatlariga tayangan holda The Times reportyori Martin Sigler xabar berdi.

«So‘nggi yangiliklar. Bu shunchaki aqlga sig‘maydi. Kecha FIFA Jahon chempionatini 64 ta jamoagacha kengaytirish ehtimoli haqida yo‘riqnoma e’lon qildi — qaror 14 avgustga qadar qabul qilinadi.

Bundan eng ko‘p kim manfaatdor ekani juda qiziq... Ehtimol, xususiy investorlardir...» — deb yozdi Sigler X ijtimoiy tarmog‘idagi o‘z sahifasida.

Shuningdek, jurnalist FIFAning Jahon chempionatiga bo‘lgan huquqlarning bir qismini xususiy investorlarga sotish rejalari haqidagi ma’lumot bilan o‘rtoqlashdi.

«Agentlikni jalb qilish bo‘yicha qaror 14 avgustgacha qabul qilinadi, shundan so‘ng agentlikda tahlilni yakunlash uchun 4 hafta vaqt bo‘ladi — 19 sentyabrga qadar muddat beriladi, toki assosiasiyalar Jahon chempionatidagi ulushni sotish uchun ovoz berishsin», — deya xabar berdi Sigler.