ФИФА август ойи ўрталарига қадар Жаҳон чемпионати иштирокчилари сонини 48 тадан 64 та терма жамоагача ошириш борасида якуний тўхтамга келишни мўлжалламоқда.

Бу ҳақда ташкилот ҳужжатларига таянган ҳолда The Times репортёри Мартин Циглер хабар берди.

«Сўнгги янгиликлар. Бу шунчаки ақлга сиғмайди. Кеча ФИФА Жаҳон чемпионатини 64 та жамоагача кенгайтириш эҳтимоли ҳақида йўриқнома эълон қилди — қарор 14 августга қадар қабул қилинади.

Бундан энг кўп ким манфаатдор экани жуда қизиқ... Эҳтимол, хусусий инвесторлардир...» — деб ёзди Циглер X ижтимоий тармоғидаги ўз саҳифасида.

Шунингдек, журналист ФИФАнинг Жаҳон чемпионатига бўлган ҳуқуқларнинг бир қисмини хусусий инвесторларга сотиш режалари ҳақидаги маълумот билан ўртоқлашди.

«Агентликни жалб қилиш бўйича қарор 14 августгача қабул қилинади, шундан сўнг агентликда таҳлилни якунлаш учун 4 ҳафта вақт бўлади — 19 сентябрга қадар муддат берилади, токи ассоциациялар Жаҳон чемпионатидаги улушни сотиш учун овоз беришсин», — дея хабар берди Циглер.