O‘zbekiston terma jamoasi hamda “Bashakshehir” klubi hujumchisi Eldor Shomurodov faoliyatini Turkiyaning boshqa klubida davom ettirishi mumkin. Haber61 nashri xabariga ko‘ra, Shomurodovga “Trabzonspor” jiddiy qiziqish bildirmoqda.

“Trabzonspor” klubi bosh murabbiyi Fotih Takka o‘zbekistonlik hujumchining o‘yin uslubini va turli sxemalarga tez moslashishini yuqori baholagan. Murabbiy Shomurodovdan markazda yagona hujumchi sifatida ham, ikki hujumchili uslubda ham samarali foydalanishni maqsad qilgan. Eldorning oldingi chiziqda jamoani bog‘lab bera olishi, tinimsiz harakati va maydonning turli nuqtalarida o‘ynay olishi murabbiylar e’tiborini tortgan.

Xabarlarga ko‘ra, “Trabzonspor” Shomurodovni olish evaziga “Bashakshehir”ga Batista Mendini va yana qo‘shimcha mablag‘ bermoqchi. Biroq hozircha klublar o‘rtasidagi muzokaralarda biror jiddiy o‘zgarish yo‘q.

“Bashakshehir” o‘tgan mavsumda jamoaning muhim to‘purarlaridan biriga aylangan hujumchi uchun ancha katta pul so‘ramoqda. Shunday bo‘lsa-da, Istanbul klubi Yevropa musobaqalaridan chiqib ketgani va jamoada hujumchilar yetarlicha ekanligi inobatga olinsa, yaqin kunlarda tomonlar kelishuvga erishishi kutilmoqda.

Ma’lumot uchun, yakunlangan mavsumda hujumchi barcha turnirlar doirasida jami 44 ta uchrashuvda maydonga tushib, 23 ta gol va 6 ta golli uzatmaga mualliflik qildi. Transfermarkt portali futbolchining bozor qiymatini 7 million yevroga baholamoqda.