Ўзбекистон терма жамоаси ҳамда “Башакшеҳир” клуби ҳужумчиси Элдор Шомуродов фаолиятини Туркиянинг бошқа клубида давом эттириши мумкин. Haber61 нашри хабарига кўра, Шомуродовга “Трабзонспор” жиддий қизиқиш билдирмоқда.

“Трабзонспор” клуби бош мураббийи Фотиҳ Такка ўзбекистонлик ҳужумчининг ўйин услубини ва турли схемаларга тез мослашишини юқори баҳолаган. Мураббий Шомуродовдан марказда ягона ҳужумчи сифатида ҳам, икки ҳужумчили услубда ҳам самарали фойдаланишни мақсад қилган. Элдорнинг олдинги чизиқда жамоани боғлаб бера олиши, тинимсиз ҳаракати ва майдоннинг турли нуқталарида ўйнай олиши мураббийлар эътиборини тортган.

Хабарларга кўра, “Трабзонспор” Шомуродовни олиш эвазига “Башакшеҳир”га Батиста Мендини ва яна қўшимча маблағ бермоқчи. Бироқ ҳозирча клублар ўртасидаги музокараларда бирор жиддий ўзгариш йўқ.

“Башакшеҳир” ўтган мавсумда жамоанинг муҳим тўпурарларидан бирига айланган ҳужумчи учун анча катта пул сўрамоқда. Шундай бўлса-да, Истанбул клуби Европа мусобақаларидан чиқиб кетгани ва жамоада ҳужумчилар етарлича эканлиги инобатга олинса, яқин кунларда томонлар келишувга эришиши кутилмоқда.

Маълумот учун, якунланган мавсумда ҳужумчи барча турнирлар доирасида жами 44 та учрашувда майдонга тушиб, 23 та гол ва 6 та голли узатмага муаллифлик қилди. Transfermarkt портали футболчининг бозор қийматини 7 миллион еврога баҳоламоқда.