Madridning «Real» klubi «Rasing»ning 19 yoshli chap qanot hujumchisi Serxio Martinesni o‘z safiga qo‘shib olish imkoniyatini ko‘rib chiqmoqda.

AS nashri ma’lumotiga ko‘ra, «Qirollik klubi» vakillari yosh futbolchining o‘yinlarini kuzatib bormoqda va uning transferiga qiziqish bildirgan.

Martinesning amaldagi shartnomasida 3 million yevro miqdorida tovon puli belgilangan. Bu esa ehtimoliy transferni amalga oshirishni ancha osonlashtirishi mumkin.

Agar transfer amalga oshsa, Martines «Real»ning zaxira jamoasi — «Kastilya» safiga qo‘shilishi mumkin. Shuningdek, madridliklar uni yana bir mavsumga ijara asosida «Rasing»da qoldirish variantini ham ko‘rib chiqmoqda.

Martines La Ligadagi debyut uchrashuvidayoq gol urishga muvaffaq bo‘ldi. U chempionatning 1-turida «Vilyarreal»ga qarshi bahsda raqib darvozasini ishg‘ol qildi. Uchrashuv 2:2 hisobida yakunlandi.