«Komo» va «Parma» «Fenerbaxche» markaziy himoyachisi Diyego Karlosni o‘z safiga qo‘shib olishga qiziqish bildirmoqda. «Parma»ning braziliyalik futbolchiga qiziqishi va «Komo» ham uni qaytarish istagida ekani boshqa manbalarda ham qayd etilgan.
33 yoshli himoyachi o‘tgan mavsumni aynan «Komo» safida ijara asosida o‘tkazgan va keyin «Fenerbaxche»ga qaytgan. Endi u yana Italiya A Seriyasida faoliyatini davom ettirishi mumkin.
«Komo» raqobatda ustun kelish va Diyego Karlos transferini yaqin kunlarda hal qilishga harakat qilmoqda. Klub braziliyalik himoyachini Sesk Fabregas qo‘l ostidagi jamoaga qaytarishni istamoqda.
Shu bilan birga, «Parma» ham futbolchi uchun jiddiy kurash olib bormoqda. Xabarlarga ko‘ra, klub Diyego Karlosni sotib olish huquqi bilan ijaraga olish taklifini ham bildirgan.
Diyego Karlos o‘tgan mavsum barcha musobaqalar doirasida 31 ta uchrashuvda maydonga tushib, 1 ta gol urdi va 1 ta golli uzatmani amalga oshirdi.
