«Liverpul»ning 19 yoshli hujumchisi Kiran Morrison 2026/27-yilgi mavsumni «Sheffild Uensdey» safida ijara asosida o‘tkazadi.
Yosh futbolchi kattalar futbolida ko‘proq o‘yin amaliyotiga ega bo‘lish va rivojlanishda davom etish maqsadida Birinchi ligada ishtirok etuvchi klub safiga qo‘shildi.
Morrison 14 yoshgacha bo‘lgan futbolchilar jamoasidan boshlab «Liverpul» akademiyasida tarbiyalangan. So‘nggi mavsumlarda u klubning U21 jamoasi asosiy futbolchilaridan biriga aylandi.
Kiran o‘tgan yilning oktyabr oyida «Liverpul»ning asosiy jamoasida debyut qildi. U Angliya Liga kubogi doirasida «Enfild»da «Kristal Pelas»ga qarshi uchrashuvni asosiy tarkibda boshladi. Keyinchalik mavsum davomida yana bir marta asosiy jamoa safida maydonga tushdi.
Morrison may oyida «Liverpul» bilan yangi shartnoma imzoladi, iyunda esa Shimoliy Irlandiya milliy jamoasida debyut qildi.
«Bu boy tarixga va ajoyib muxlislarga ega ulkan klub. Shuning uchun transfer amalga oshganidan xursandman va muxlislar qarshisida maydonga tushishni intiqlik bilan kutyapman.
Hozir klubda qayta qurish jarayoni ketayotganini hamma biladi va men uning bir qismi bo‘lishni xohlayman. Bizda kuchli tarkib bor, ligada esa raqobat yuqori. Shunga qaramay, bu chempionatda juda yaxshi natijalarga erisha olamiz, deb o‘ylayman va jamoaga har qanday yo‘l bilan yordam berishni istayman.
Muxlislarga, bosh murabbiyga va barchaga nima uchun murabbiy meni o‘z safiga qo‘shib olishni istaganini hamda bu yerda o‘ynashga munosib ekanimni ko‘rsatmoqchiman», — dedi Morrison.
