"Napoli" "Chelsi" hujumchisi Mark Giu transferi bo‘yicha muzokaralarni faollashtirdi. 20 yoshli ispaniyalik futbolchi Neapol klubining hujum chizig‘ini kuchaytirishdagi asosiy maqsadiga aylangan.

Jurnalist Janluka Di Marsio ma’lumotiga ko‘ra, "Napoli" Giu uchun 15-16 million yevro va qo‘shimcha bonuslar taklif qilishga tayyor. Gap futbolchini to‘liq sotib olish haqida ketmoqda.

Italiya klubi yaqin vaqt ichida muzokaralarni yanada jadallashtirishi mumkin.

Giuning o‘zi ham transferga qiziqish bildirmoqda. U ko‘proq o‘yin amaliyotiga ega bo‘lish va muntazam ravishda maydonga tushishni xohlayapti.

Futbolchining yoshi ham "Napoli" uchun qo‘shimcha ustunlik hisoblanadi. Giu 2006 yilda tug‘ilgani sababli, A Seriya qoidalariga ko‘ra chempionat qaydnomasida alohida o‘rin egallamaydigan futbolchi sifatida ro‘yxatdan o‘tkazilishi mumkin.