Qozog‘istonlik shaxmatchi Bibisora Assaubayeva Fransiyaning Sen-Trope shahrida o‘tkazilgan WR Women’s Chess Tour xalqaro turnirida muvaffaqiyatli ishtirok etdi. U ayollar o‘rtasidagi Yevropa bosqichida tezkor shaxmat (rapid) yo‘nalishi bo‘yicha g‘oliblikni qo‘lga kiritdi.

Assaubayeva uchun musobaqaning chorak va yarimfinal bahslari o‘ta shiddatli kechdi. Har ikki bosqichda ham asosiy partiyalar durang bilan yakunlangach, g‘olib nomi tay-breykda aniqlandi. Qozog‘istonlik grossmeyster armageddon partiyalarida raqiblarini yengib, hal qiluvchi bahsga yo‘llanma oldi.

Turnirning final uchrashuvida esa Assaubayeva ukrainalik tajribali shaxmatchi Mariya Muzichuk ustidan 2:0 hisobida ishonchli g‘alabani qo‘lga kiritdi. Pley-off formatida o‘tkazilgan musobaqadagi g‘oliblik evaziga qozog‘istonlik grossmeyster 10 ochkoga ega bo‘ldi.

27-avgust kuni Sen-Tropeda blis yo‘nalishi bo‘yicha uchrashuvlariga start beriladi. Blis bahslaridan so‘ng eng yuqori o‘rinlarni qo‘lga kiritgan ikki nafar shaxmatchi noyabr oyida Germaniyaning Shtutgart shahrida bo‘lib o‘tadigan Grand Final bosqichida ishtirok etish huquqini qo‘lga kiritadi.