Jurnalist Jota Jordi El Chiringuito dasturida «Atletiko» Xulian Alvaresga muayyan shartlar bajarilgan taqdirda uning «Barselona»ga transferi bo‘yicha muzokara olib borishga yozma kafolat berganini da’vo qildi.

Jurnalistning aytishicha, u bir necha oy oldin argentinalik hujumchi va Madrid klubi o‘rtasida imzolangan ushbu hujjatni shaxsan ko‘rgan.

«Atletiko» futbolchiga uning «Barselona»ga o‘tishiga ruxsat berishini kafolatlaganini isbotlash mumkin. Men buni bilaman, chunki hujjatni o‘z ko‘zim bilan ko‘rganman. Aytayotganlarimni shaxsan ko‘rganman», — dedi Jota Jordi.

Uning so‘zlariga ko‘ra, o‘sha uchrashuvda «Atletiko» ikki shart qo‘ygan.

«Birinchi shart — futbolchining o‘zi bu masalada ochiq gapirishi edi. Ikkinchidan, unga yozma ravishda «Barselona»ga o‘tish mumkinligi bildirilgan. Men bu hujjatni ko‘rganman, shuning uchun aytayotgan gaplarimga ishonchim komil», — dedi jurnalist.

Jota Jordi transfer oynasi yopilganidan keyin o‘z da’vosini tasdiqlovchi dalillarni ko‘rsatishini ham aytdi.

«2 sentyabr kuni buni isbotlayman», — deya qo‘shimcha qildi u.

Shu bilan birga, dasturning yana bir ishtirokchisi Mariya Trisakning ta’kidlashicha, transfer amalga oshmaganiga «Barselona»ning taklifi sabab bo‘lgan. Kataloniyaliklar 100 million yevro taklif qilgan, ammo bu summa «Atletiko»ning moliyaviy talablariga javob bermagan.

Transfer oynasi yopilishiga sanoqli kunlar qolgan bir paytda Xulian Alvares «Atletiko» bilan mashg‘ulotlarga qaytgan. Hozircha uning jamoadan ketishi rasman tasdiqlangani yo‘q.