Журналист Жота Жорди El Chiringuito дастурида «Атлетико» Хулиан Альваресга муайян шартлар бажарилган тақдирда унинг «Барселона»га трансфери бўйича музокара олиб боришга ёзма кафолат берганини даъво қилди.

Журналистнинг айтишича, у бир неча ой олдин аргентиналик ҳужумчи ва Мадрид клуби ўртасида имзоланган ушбу ҳужжатни шахсан кўрган.

«Атлетико» футболчига унинг «Барселона»га ўтишига рухсат беришини кафолатлаганини исботлаш мумкин. Мен буни биламан, чунки ҳужжатни ўз кўзим билан кўрганман. Айтаётганларимни шахсан кўрганман», — деди Жота Жорди.

Унинг сўзларига кўра, ўша учрашувда «Атлетико» икки шарт қўйган.

«Биринчи шарт — футболчининг ўзи бу масалада очиқ гапириши эди. Иккинчидан, унга ёзма равишда «Барселона»га ўтиш мумкинлиги билдирилган. Мен бу ҳужжатни кўрганман, шунинг учун айтаётган гапларимга ишончим комил», — деди журналист.

Жота Жорди трансфер ойнаси ёпилганидан кейин ўз даъвосини тасдиқловчи далилларни кўрсатишини ҳам айтди.

«2 сентябрь куни буни исботлайман», — дея қўшимча қилди у.

Шу билан бирга, дастурнинг яна бир иштирокчиси Мария Трисакнинг таъкидлашича, трансфер амалга ошмаганига «Барселона»нинг таклифи сабаб бўлган. Каталонияликлар 100 миллион евро таклиф қилган, аммо бу сумма «Атлетико»нинг молиявий талабларига жавоб бермаган.

Трансфер ойнаси ёпилишига саноқли кунлар қолган бир пайтда Хулиан Альварес «Атлетико» билан машғулотларга қайтган. Ҳозирча унинг жамоадан кетиши расман тасдиқлангани йўқ.