«Arsenal» bosh murabbiyi Mikel Arteta jamoada motivasiya bilan bog‘liq muammo bor-yo‘qligi haqida fikr bildirdi.
«Kanonirlar» o‘tgan mavsumni uzoq kutilgan Angliya Premyer-ligasi chempionligi bilan yakunlagan edi. Jurnalistlar ispaniyalik mutaxassisdan futbolchilarning g‘alabaga bo‘lgan ishtiyoqini qanday saqlab qolayotganini so‘rashdi.
«Bu juda oddiy. Menimcha, birinchi kundanoq hammaga aniq signal berilgan. Shuning uchun agar jamoada kimdir boshqacha fikrlayotgan bo‘lsa, unga bu yerda qolmagani ma’qul — boshqa joyda o‘z kuchini sinab ko‘rsin», — deya Artetaning so‘zlarini Arsenal Radar keltirmoqda.
Yakshanba kuni «Arsenal» APLning 3-turida o‘z maydonida «Chelsi»ni qabul qiladi. Har ikki jamoa chempionatning dastlabki ikki uchrashuvida g‘alaba qozongan.
