Bugun, 11 sentyabr kuni O‘zbekiston Superligasida 21-turning so‘nggi uchrashuvlari bo‘lib o‘tadi. Kun taqvimidan ikkita bahs o‘rin olgan.
Soat 19:00 da «Lokomotiv» o‘z maydonida «Mash’al»ni qabul qiladi. Ayni paytda toshkentliklar 20 ta uchrashuvdan keyin 32 ochko bilan 6-o‘rinda bormoqda. «Mash’al» esa 4 ochko bilan turnir jadvalining so‘nggi — 16-pog‘onasini egallab turibdi.
Xuddi shu vaqtda «Buxoro» va «Navbahor» o‘rtasidagi bahs ham start oladi. Buxoroliklar 20 o‘yindan keyin 34 ochko jamg‘arib, 4-o‘rinda joylashgan. 38 ochkoga ega «Navbahor» esa 3-pog‘onada bormoqda.
21-turning avvalgi uchrashuvlarida «Paxtakor» OKMKni 3:1, «Neftchi» «Surxon»ni 2:1, «Nasaf» «Bunyodkor»ni 3:0, «Dinamo» «Qizilqum»ni 1:0 va «Andijon» «Qo‘qon-1912»ni 2:1 hisobida mag‘lub etdi. «Xorazm» — «So‘g‘diyona» bahsida esa hisob ochilmadi — 0:0.
Ayni paytda chempionat peshqadami «Neftchi» 21 o‘yindan 48 ochko jamg‘argan. Ikkinchi o‘rindagi «Paxtakor» hisobida 46 ochko mavjud. «Navbahor» esa bugungi uchrashuv oldidan 38 ochko bilan kuchli uchlikni yakunlab turibdi.
