«Tottenxem» Angliya Premyer-ligasining dastlabki 4 ta o‘yinida birorta ham gol ura olmadi. Jamoa bosh murabbiyi Roberto De Dzerbi bu holatning asosiy sabablariga to‘xtalib o‘tdi.

Italiyalik mutaxassisning aytishicha, muammo faqat gollar yo‘qligi bilan cheklanmaydi. Futbolchilarning jismoniy holati va o‘ziga bo‘lgan ishonchning pasayishi ham jamoa natijalariga ta’sir qilmoqda.

«Jismoniy holat? Bu jahon chempionatidan keyingi vaziyat bilan bog‘liq. Avstraliyada biz jarohatlarga duch keldik, shundan keyin futbolchilar to‘laqonli ishlay olmadi.

Men optimist ham, pessimist ham emasman — realistman. Agar sen dastlabki 30 daqiqada biz o‘ynagan futbolni ko‘rsata olsang, demak, futbol o‘ynashni bilasan.

Endi shu yaxshi o‘yinni 60, 65, 70, 80 va oxir-oqibat 90 daqiqaga yetkazishimiz kerak. Shundan keyin uchrashuvning so‘nggi qismida yanada diqqatliroq bo‘lishimiz lozim.

Gollar yo‘qligi? Men jurnalist ham, ijtimoiy tarmoqdagi bloger ham emasman. Men murabbiyman va o‘yinni tahlil qilishim kerak.

Futbolchilarimning sifatini, gol urishimiz kerak bo‘lgan vaziyatlarni va maydonda qabul qilingan qarorlarni tahlil qilishim lozim.

Biz dastlabki yarim soatni yaxshi o‘tkazdik, ammo gol ura olmadik. Keyin esa ishonchimizni yo‘qota boshladik. Bu ham bizning muammolarimizdan biri.

Ikkinchi bo‘limda ko‘plab futbolchilarda o‘ziga bo‘lgan ishonch biroz pasayganini ko‘rdim va bu menga yoqmadi.

Futbolchilar ham his-tuyg‘u va fikrlarga ega insonlar. Men ularga yordam berishim kerak.

Agar 30 daqiqa o‘ynaganimizdek 90 daqiqa harakat qila olsak, o‘ylaymanki, ko‘plab uchrashuvlarda g‘alaba qozonamiz», — dedi De Dzerbi Sky Sports efirida.

«Tottenxem» Premyer-liganing keyingi turida yana o‘z maydonida o‘ynaydi. Londonliklar «Aston Villa»ni qabul qiladi.