AS nashri Tibo Kurtua haqida material e’lon qildi. Unda aytilishicha, bu safar «Real» so‘nggi yillarda katta yoshli futbolchilar bilan ko‘pincha qilganidek, futbolchining kelajagi masalasini hal qilish uchun mavsum yakunini kutmaydi. «Real» Kurtuaning yuqori darajasini hanuz qadrlamoqda — belgiyalik darvozabon shartnomasini 2027/2028 yilgi mavsum oxirigacha uzaytirishga juda yaqin.

34 yoshli Kurtua ham jamoadagi holatidan mamnun va klubini o‘zgartirishni istamayapti.

«Belgiyalik futbolchi «Real»da imkon qadar uzoq vaqt qolishdan juda xursand. Moliyaviy jihatdan yanada manfaatli bozorlardagi klublardan kelayotgan takliflar ular tushishi bilanoq rad etilmoqda», — deyiladi materialda.

Tibo Kurtua 2018 yil avgust oyidan buyon «Real» sharafini himoya qilib kelmoqda.