Bugun, 14 sentyabr kuni Elit Osiyo Chempionlar ligasi musobaqasining 2026/27 yilgi mavsumiga start beriladi. O‘zbekiston nomidan ishtirok etayotgan "Neftchi" va "Paxtakor" birinchi turning o‘zidayoq muhim bahslarda maydonga tushadi.

Farg‘onaning "Neftchi" klubi o‘z maydonida Iroqning "Al-Quva Al-Javiya" jamoasini qabul qiladi. "Istiqlol" stadionidagi uchrashuv Toshkent vaqti bilan soat 18:45 da boshlanadi.

"Neftchi" ushbu bahsga ichki chempionat peshqadami sifatida yetib keldi. Farg‘onaliklar Superliganing 21 turidan keyin 48 ochko jamg‘arib, birinchi o‘rinda bormoqda. Jamoa so‘nggi turda "Surxon"ni 2:1 hisobida mag‘lub etdi.

"Al-Quva Al-Javiya" esa Iroq chempionatida o‘tkazgan yettita uchrashuvidan keyin 7 ochkoga ega. Bag‘dod klubi so‘nggi beshta o‘yinining faqat bittasida g‘alaba qozongan. Shu bois o‘z muxlislari qarshisida to‘p tepadigan "Neftchi" uchun Osiyodagi yangi mavsumni g‘alaba bilan boshlash imkoniyati yuqori.

Kunning ikkinchi uchrashuvida "Paxtakor"ni ancha murakkab vazifa kutmoqda. Toshkentliklar Jidda shahrida Saudiya Arabistonining kuchli klublaridan biri "Al-Ahli" mehmoni bo‘ladi. "Alinma Stedium"dagi bahs Toshkent vaqti bilan soat 23:15 da start oladi.

"Paxtakor" Osiyo Chempionlar ligasi Elite bahsiga yaxshi kayfiyatda yetib kelmoqda. Jamoa Superligadagi so‘nggi ikki o‘yinida "Andijon"ni 3:0, OKMKni esa safarda 3:1 hisobida mag‘lub etdi.

21 turdan keyin 46 ochko to‘plagan "Paxtakor" turnir jadvalida ikkinchi o‘rinni egallab turibdi va peshqadam "Neftchi"dan atigi ikki ochko ortda qolmoqda.

"Al-Ahli" esa musobaqaning eng kuchli jamoalaridan biri sifatida baholanadi va o‘z maydonida favorit hisoblanadi. Biroq Saudiya klubining yangi mavsumdagi natijalari hozircha barqaror emas. Bu esa "Paxtakor"ga Jiddada ijobiy natija uchun kurashish imkonini beradi.

18:45 — "Neftchi" — "Al-Quva Al-Javiya"
23:15 — "Al-Ahli" — "Paxtakor"