Antoni Marsyal Liviyaning «Al-Ittihod» klubidan tushgan katta moliyaviy taklifni rad etdi.

Foot Mercato ma’lumotiga ko‘ra, Tripoli klubi 30 yoshli fransuzga ikki yillik shartnoma va shu davr uchun soliqlardan tashqari jami 10 million yevro maosh taklif qilgan. Bundan tashqari, futbolchiga shartnoma imzolash bonusi sifatida yana 5 million yevro berish rejalashtirilgan.

Biroq Marsyal hozirgi bosqichda moliyaviy shartlardan ko‘ra sport loyihasini ustun qo‘yayotgani sababli bu taklifni qabul qilmagan.

Ayni paytda hujumchi mustaqil ravishda jismoniy holatini saqlab turibdi va La Ligada ishtirok etayotgan «Malaga» bilan muzokara olib bormoqda. Manbaga ko‘ra, muzokaralar ancha ilgarilagan va transfer yaqin kunlarda amalga oshishi mumkin.

Marsyal yoz boshida Meksikaning «Monterrey» klubi bilan shartnomasini muddatidan oldin bekor qilgan edi. U o‘tgan mavsumda jamoa safida 20 ta o‘yin o‘tkazib, 1 ta gol urgan.

Shuningdek, fransuz futbolchisi avvalroq Fransiya Liga 1 klublaridan tushgan ikkita aniq taklifni ham rad etgan. Bunga unga yetarli o‘yin amaliyoti kafolatlanmagani sabab bo‘lgan.