Futzal bo‘yicha O‘zbekiston milliy terma jamoasi 11 sentyabr sanasidan Toshkentda navbatdagi o‘quv-mashg‘ulot yig‘iniga kirishdi.
Ispaniyalik mutaxassis Xose Mariya Mendes boshchiligidagi terma jamoamiz a’zolari to‘rt kun davomida poytaxtimizdagi O‘FA Terma jamoalar markazi sport zalida mashg‘ulotlar olib borishdi. Shundan so‘ng vakillarimiz Yevropa safariga jo‘nab ketishdi.
FIFA kunlari doirasidagi kelishuvga binoan, O‘zbekiston milliy terma jamoasi Yevropaning ikki kuchli terma jamoasiga qarshi to‘rtta nazorat uchrashuvi o‘tkazishi rejalashtirilgan.
Vengriya bilan ikki uchrashuv
15 sentyabr kuni erta tongda Budapesht shahriga yo‘l olgan terma jamoamiz 17 sentyabr kuni mahalliy vaqt bilan 18:00 da Vengriya terma jamoasiga qarshi ilk xalqaro o‘rtoqlik uchrashuvini o‘tkazadi.
Ikkinchi uchrashuv esa 19 sentyabr kuni mahalliy vaqt bilan 16:00 da boshlanadi.
Niderlandiya bilan ikki uchrashuv
Vengriya safaridagi bahslardan so‘ng vakillarimiz 20 sentyabr kuni Niderlandiyaning Amsterdam shahriga yo‘l oladi. «Lolalar mamlakati»da Xose Mariya Mendes shogirdlarini Niderlandiya Qirolligi terma jamoasiga qarshi ikkita o‘rtoqlik uchrashuvi kutib turibdi.
Birinchi xalqaro o‘rtoqlik uchrashuvi 21 sentyabr, ikkinchi bahs esa 22 sentyabr kuni bo‘lib o‘tadi.
Shundan so‘ng milliy terma jamoamiz a’zolari O‘zbekistonga qaytib kelishadi.
